ކޮލެސްޓްރޯލް ދަށްކުރުމަށް ބޭނުންކުރާ ބޭސްތަކާ ގުޅޭގޮތުން ޑރ. އަސީމް މަލްހޯތްރާ ވަނީ ސުވާލު އުފައްދާފައެވެ. އޭނާ ބުނާ ގޮތުގައި މިއީ ޓްރިލިއަން ޑޮލަރުގެ “މަކަރާއި ހީލަތުގެ ވިޔަފާރިއެއް” ކަމުގައެވެ.
ޑރ. އަސީމް މަލްހޯތްރާއަކީ އިނގިރޭސިވިލާތުގެ ނަން މޮޅު ކާޑިއޮލޮޖިސްޓެކެވެ. އޭނާއަކީ ހިތުގެ ބަލިތަކާއި ކާނާގެ ދާއިރާއިން ގިނަ ދިރާސާތަކެއް ކޮށްފައިވާ މާހިރެކެވެ. އޭނާ ވަނީ ކޮލެސްޓްރޯލްއާ ގުޅޭ ގޮތުން ގިނަ މަޝްހޫރު މަޖައްލާތަކުގައި ލިޔުއްވާފައެވެ. އަދި ބީބީސީ އާއި ސީއެންއެން ފަދަ ބޮޑެތި މީޑިއާތަކުގައި ވެސް ބައިވެރިވެ ވަޑައިގެންފައިވެއެވެ. އެހެންނަމަވެސް، އޭނާގެ ބައެއް ޚިޔާލުތަކާމެދު އެހެން ބައެއް މާހިރުން ދެބަސްވާކަން ފާހަގަކުރަމެވެ.
ޑރ. މަލްހޯތްރާ ވިދާޅުވި ގޮތުގައި ޓްރައިގްލިސެރައިޑްސް އަދި އެޗްޑީއެލް ފަދަ ކޮލެސްޓްރޯލްގެ ބައިތަކަށް ބަލާއިރު، އެލްޑީއެލް ކޮލެސްޓްރޯލްއާއި ހިތުގެ ބަލިތަކާ ދެމެދު ގުޅުމެއް ނެތެވެ. އޭނާ ވިދާޅުވީ މި މަޢުލޫމާތު ވަނީ އަހަރުތަކެއް ކުރިން ވެސް ލިބެން ހުރި ކަމަށެވެ.
“ފްރެމިންގްހަމް ދިރާސާގެ ނަތީޖާތަކުން ދައްކާ ގޮތުގައި އެލްޑީއެލް ކޮލެސްޓްރޯލް 250 ނުވަތަ 300 އަށްވުރެ ދަށްނަމަ، އެއީ ހިތުގެ ބައްޔެއްގެ ރިސްކް ފެކްޓަރެއް ނޫން. އަދި 99 އިންސައްތަ މީހުންގެ އެލްޑީއެލް ކޮލެސްޓްރޯލް ހުންނަނީ މިއަށްވުރެ ދަށުގައި،” ޑރ. މަލްހޯތްރާ ވިދާޅުވިއެވެ.
އިތުރަށް، ޖެނެޓިކް ގޮތުން އެލްޑީއެލް ކޮލެސްޓްރޯލް މަތި މީހުންގެ މައްޗަށް ކުރެވުނު ދިރާސާއެއްގައި، ހިތުގެ ބަލި ޖެހުނު މީހުންނާއި ނުޖެހޭ މީހުންގެ އެލްޑީއެލް ކޮލެސްޓްރޯލްގެ މިންވަރުގައި ތަފާތެއް ނެތްކަން ފާހަގަކުރެވުނެވެ. މިއީ އެލްޑީއެލް ކޮލެސްޓްރޯލް ހިތުގެ ބަލީގެ ސަބަބެއް ކަމަށް ދެކޭ ނަޒަރިއްޔާ ވަޅުލުމަށް އިތުރު ހެއްކެއް ކަމަށް ޑރ. މަލްހޯތްރާ ވިދާޅުވިއެވެ.
ޑރ. މަލްހޯތްރާ ވިދާޅުވި ގޮތުގައި ސްޓެޓިން ބޭހުގެ ފައިދާ ހަމައެކަނި 1 އިންސައްތައެވެ. އެހެންނަމަވެސް، މި ބޭހުގެ ދިރާސާތައް މިނިވަން ފަރާތްތަކުން ވަޒަންކޮށްފައި ނުވާކަން އޭނާ ފާހަގަކުރެއްވިއެވެ.
“ސްޓެޓިންގެ ކުޑަ ފައިދާއެއް ލިބެނީ އޭގެ އެންޓި-ކްލޮޓިންގ އަދި އެންޓި-އިންފްލެމޭޓަރީ އަސަރުގެ ސަބަބުން. ހިތުގެ ބަލިތަކަކީ އިންފްލެމޭޝަނާ ގުޅިފައިވާ ކަމެއް،” ޑރ. މަލްހޯތްރާ ވިދާޅުވިއެވެ.
އޭނާ އިތުރަށް ވިދާޅުވި ގޮތުގައި، ހިތުގެ ބަލިތަކަށް މައިގަނޑު ގޮތެއްގައި ދިމާވަނީ އިންސިއުލިން ރެސިސްޓެންސް، އިންފްލެމޭޝަން، އަދި ނުބައި ކާނާ (ޚާއްޞަކޮށް އަލްޓްރާ ޕްރޮސެސްޑް ކާނާ) ގެ ސަބަބުންނެވެ. އެލްޑީއެލް ކޮލެސްޓްރޯލް ދަށްކުރުމަށް އެހާ ބޮޑު އަހައްމިއްޔަތުކަމެއް ދިނުމަކީ ރަނގަޅު ގޮތެއް ނޫން ކަމަށް އޭނާ ވިދާޅުވިއެވެ.
“އަޅުގަނޑުމެން ބްރިޓިޝް މެޑިކަލް ޖާނަލްގައި ޝާއިޢުކުރި ދިރާސާއަކުން ދައްކާ ގޮތުގައި، ހަމައެކަނި އެލްޑީއެލް ކޮލެސްޓްރޯލް ދަށްކުރުމުން ހިތުގެ ބަލިތަކާއި ސްޓްރޯކް ހުއްޓުވޭކަމުގެ އެއްވެސް ހެއްކެއް ނެތް. އެހެންކަމުން، މި ކަމަށް މިހާ ބޮޑު އިސްކަމެއް ދިނުމަކީ ރަނގަޅު ކަމެއް ނޫން،” ޑރ. މަލްހޯތްރާ ވިދާޅުވިއެވެ.
ޒިންމާ ބަރީއަކުރުން: މި ލިޔުމަކީ މަޢުލޫމާތު ދިނުމުގެ ބޭނުމުގައި ހިއްސާކުރެވޭ އެއްޗެކެވެ. މިއީ ޞިއްޙީ ލަފައެއް ނޫނެވެ. ބޭހެއް ނަގަން ނިންމުމުގެ ކުރިން، އަމިއްލައަށް ދިރާސާކޮށް، އިތުބާރުހުރި މަޞްދަރުތަކުން މަޢުލޫމާތު ހޯދައި، ޑޮކްޓަރެއްގެ ލަފާ ހޯދުން މުހިންމެވެ. ޞިއްޙަތާ ގުޅޭ ނިންމުންތައް ނިންމަންވާނީ އެކަށީގެންވާ މަޢުލޫމާތާއި ޞިއްޙީ ފަންނުވެރިންގެ ލަފާގެ މަތިންނެވެ. ކޮވިޑް-19 ވެކްސިން ދިނުމުގެ އުސޫލުތަކާއި، އެކަމާ ގުޅިގެން އެޅުނު ހަރުކަށި ފިޔަވަޅުތަކާ ގުޅިގެން ދުނިޔޭގެ ގިނަ އިންސާނިއްޔަތުގެ ޑޮކްޓަރުން ހޭލުންތެރިވެގެން ދިޔައެވެ. އެ ބޭފުޅުން ދެކޭ ގޮތުގައި، ބޭސް ވިޔަފާރީގެ ނުފޫޒުގަދަ ފަރާތްތަކުގެ (މެޑިކަލް މާފިޔާ) ބާރު ސަރުކާރުތަކާއި ބައެއް ޞިއްޙީ މާހިރުންގެ މައްޗަށް ފޯރާފައިވާ ކަމަށް ބެލެވެއެވެ. އެހެންކަމުން، މި ޑޮކްޓަރުން ބާރުއަޅުއްވަނީ ކޮންމެ ބޭހަކާ މެދުވެސް އަމިއްލައަށް ދިރާސާކޮށް، މަޢުލޫމާތު ހޯދުމަށެވެ. އެއް ބަޔަކު ބުނާ އެއްޗަކަށް ކަނުބީރުކަންފަތެއް ދިނުމުގެ ބަދަލުގައި، އެކި ފަރާތްތަކުގެ ޚިޔާލު ހޯދައި، އަމިއްލައަށް ވިސްނައި ފިކުރުކުރުމަށް އެ ބޭފުޅުން ގޮވާލައްވައެވެ. މިކަމަކީ ކޮންމެ މީހެއްގެ ޞިއްޙަތާ ގުޅުންހުރި މުހިންމު ކަމެއް ކަމުގައި އެ ބޭފުޅުން ދެކެވަޑައިގަންނަވައެވެ.
